بھارت کی تاریخ میں امبانی سے مہنگی شادی کرنے والا جناردھن ریڈی کون ہے؟

نئی دہلی: بھارت کی تاریخ میں سب سے مہنگی شادی کا اعزاز کسی امبانی کو نہیں بلکہ سابق کرناٹک وزیر جناردھن ریڈی کو حاصل ہوا، جنہوں نے 2016 میں اپنی بیٹی برہمانی کی شادی پر 1600 کروڑ پاکستانی روپے سے زیادہ خرچ کیے تھے۔
یہ شاندار تقریب 16 نومبر 2016 کو منعقد ہوئی، جس میں تقریباً 50,000 مہمانوں نے شرکت کی۔ شادی کی تقریبات پانچ دن تک جاری رہیں اور اس کے شاہانہ انتظامات نے پورے ملک کی توجہ اپنی جانب مبذول کر لی۔
جناردھن ریڈی نے اپنی بیٹی کی شادی کو یادگار بنانے کے لیے بنگلورو کے فائیو اسٹار اور تھری اسٹار ہوٹلوں میں 1,500 کمرے بک کرائے۔ شادی کا پنڈال وجے نگر سلطنت کے شاہی مندروں سے متاثر ہو کر بنایا گیا تھا، جسے بالی ووڈ کے ماہر آرٹ ڈائریکٹرز نے خصوصی طور پر تیار کیا۔
برہمانی کا عروسی لباس بھی بے حد قیمتی تھا۔ انہوں نے معروف ڈیزائنر نیتا للو کی تیار کردہ سرخ کانچی ورم ساڑھی زیب تن کی، جس کی مالیت 55 کروڑ روپے تھی۔ اس ساڑھی پر خالص سونے کے دھاگے سے نفیس کڑھائی کی گئی تھی، جو اسے مزید نایاب اور بیش قیمت بناتی تھی۔
برہمانی کے زیورات بھی اپنی مثال آپ تھے۔ 80 کروڑ روپے مالیت کا ہیروں سے جڑا چوکر ہار، ہیروں سے سجی مانگ ٹیکا اور پنچڈالہ زیور ان کی دلکشی میں مزید اضافہ کر رہے تھے، یہاں تک کہ ان کی چوٹی بھی ہیرے جڑے زیورات سے آراستہ تھی۔ ان کے تمام زیورات کی مجموعی مالیت تین ارب روپے بتائی جاتی ہے، جب کہ عروسی میک اپ پر بھی ایک کروڑ روپے خرچ کیے گئے۔
مہمانوں کو شادی میں خصوصی پروٹوکول دیا گیا۔ 40 بیل گاڑیاں اور 2,000 لگژری ٹیکسیاں مہمانوں کو لے جانے کے لیے استعمال ہوئیں، جب کہ 15 ہیلی کاپٹرز بھی مہمانوں کی آمد و رفت کے لیے کرائے پر حاصل کیے گئے۔
شاہی ضیافت میں 16 اقسام کی مٹھائیاں پیش کی گئیں، اور ہر پلیٹ کی قیمت تقریباً 3,000 روپے تھی۔
یہ غیر معمولی شادی پورے بھارت میں موضوعِ بحث بن گئی، خاص طور پر اس لیے کہ یہ ایسے وقت میں ہوئی جب ملک نوٹ بندی (Demonetization) کے بحران سے گزر رہا تھا۔ جناردھن ریڈی کو اتنی بے دریغ دولت خرچ کرنے پر شدید تنقید کا سامنا کرنا پڑا، اور کئی سیاسی جماعتوں نے ان کے اثاثوں پر سوالات اٹھائے۔
حال ہی میں اننت امبانی اور رادھیکا مرچنٹ کی شادی کو بھارت کی مہنگی ترین شادی قرار دیا جا رہا ہے، جس پر مبینہ طور پر 600 ملین ڈالر خرچ کیے گئے۔ تاہم، جناردھن ریڈی کی بیٹی کی شادی آج بھی بھارت کی سب سے پرتعیش تقریبات میں شمار ہوتی ہے۔