لاہور :محکمہ موسمیات نے ملک میں شوال کا چاند دیکھنے اور عیدالفطر کے حوالے سے پیشگوئی کرتے ہوئے امکان ظاہر کیا ہے کہ عیدالفطر 31 مارچ بروز پیر کو منائی جائے گی۔
محکمہ موسمیات کے مطابق شوال کے چاند کی پیدائش 29 مارچ کو سہ پہر 3 بج کر 58 منٹ پر ہوگی۔ 30 مارچ کو چاند کی عمر رویت کے وقت تقریباً 27 گھنٹے ہوگی اور غروب آفتاب کے بعد یہ 70 منٹ تک آسمان پر دکھائی دے گا۔
مزید بتایا گیا ہے کہ انسانی آنکھ 20 گھنٹے کی عمر کے چاند کو براہ راست دیکھنے کے قابل ہوتی ہے، جبکہ 16 سے 18 گھنٹے کے چاند کو دیکھنے کے لیے دوربین کا استعمال ضروری ہوتا ہے۔
محکمہ موسمیات کا کہنا ہے کہ ان عوامل کو مدنظر رکھتے ہوئے، 30 مارچ کو بغیر کسی دشواری کے چاند کا انسانی آنکھ سے مشاہدہ کیے جانے کا قوی امکان ہے۔
