آکلینڈ :پاکستان اور نیوزی لینڈ کے درمیان پانچ میچوں پر مشتمل ٹی ٹوئنٹی سیریز کا تیسرا میچ کل (جمعہ) ایڈن پارک، آکلینڈ میں کھیلا جائے گا۔ میچ پاکستانی وقت کے مطابق سوا گیارہ بجے شروع ہوگا۔ اس وقت میزبان نیوزی لینڈ کو سیریز میں پاکستان پر 0-2 کی برتری حاصل ہے۔
پہلے میچ میں نیوزی لینڈ نے پاکستان کو باآسانی 9 وکٹوں سے شکست دی تھی، جبکہ دوسرے میچ میں کیوی ٹیم نے گرین شرٹس کو 5 وکٹوں سے ہرایا تھا۔ پاکستان کی قیادت سلمان علی آغا کر رہے ہیں، جو اس سے قبل زمبابوے کے خلاف سیریز میں کپتانی کر چکے ہیں، جسے پاکستان نے 1-2 سے جیتا تھا۔
پاکستانی اسکواڈ میں شاداب خان، محمد حارث، عمیر بن یوسف، حسن نواز، عبدالصمد، عرفان نیازی، خوشدل شاہ، عباس آفریدی، محمد علی، شاہین شاہ آفریدی، حارث رؤف، سفیان مقیم، ابرار احمد، جہانداد خان اور عثمان خان شامل ہیں۔ دوسری جانب نیوزی لینڈ کی قیادت مائیکل بریسویل کر رہے ہیں، جن کی بطور کپتان یہ دوسری سیریز ہے۔ اس سے قبل وہ گزشتہ سال پاکستان میں کھیلی گئی سیریز میں قیادت کر چکے ہیں، جو 2-2 سے برابر رہی تھی۔
نیوزی لینڈ کی موجودہ ٹیم میں سات کھلاڑی وہ ہیں، جنہوں نے حال ہی میں آئی سی سی چیمپئنز ٹرافی کا فائنل کھیلا تھا۔ دونوں ٹیموں کے درمیان اب تک 46 ٹی ٹوئنٹی انٹرنیشنل میچز ہو چکے ہیں، جن میں پاکستان نے 23 جبکہ نیوزی لینڈ نے 21 میچز جیتے ہیں، جبکہ دو میچز بے نتیجہ رہے۔
سیریز کا چوتھا ٹی ٹوئنٹی میچ 23 مارچ کو بے اوول، ماؤنٹ مونگانوئی میں ہوگا، جبکہ پانچواں اور آخری ٹی ٹوئنٹی 26 مارچ کو سکائی اسٹیڈیم، ویلنگٹن میں کھیلا جائے گا۔ ٹی ٹوئنٹی سیریز کے بعد دونوں ٹیمیں 29 مارچ کو نیپئر جائیں گی، جہاں وہ تین میچوں پر مشتمل ون ڈے سیریز کھیلیں گی۔
پہلا ون ڈے 29 مارچ کو میک لین پارک، نیپئر میں ہوگا، دوسرا ون ڈے 2 اپریل کو سڈن پارک، ہملٹن میں جبکہ تیسرا اور آخری ون ڈے 5 اپریل کو بے اوول، ماؤنٹ مونگانوئی میں کھیلا جائے گا۔
