دنیا بھر میں رمضان المبارک کا آخری عشرہ شروع ہوتے ہی مسلمان عید کی تیاریوں میں مصروف ہو جاتے ہیں۔ عبادتوں کے ساتھ ساتھ عید کے لیے خریداری بھی زور پکڑ لیتی ہے۔ ایسے میں مغربی بنگال حکومت نے سرکاری ملازمین کے لیے خوشخبری سنائی ہے کہ انہیں عید کے موقع پر بونس دیا جائے گا، جس سے ان کی خوشیاں دوبالا ہو جائیں گی۔
تفصیلات کے مطابق بھارتی میڈیا کا کہنا ہے کہ مغربی بنگال کی ممتا بنرجی حکومت نے فیصلہ کیا ہے کہ وہ اپنے ان سرکاری ملازمین کو عید کے موقع پر 6,800 روپے کا بونس دے گی، جو پیداوار سے متعلق بونس سسٹم میں شامل نہیں ہیں۔
رپورٹ کے مطابق یہ بونس ریاست کے ان سرکاری ملازمین کو ملے گا جن کی تنخواہ 44 ہزار روپے ماہانہ سے کم ہے۔ اس کے ساتھ ساتھ ریٹائرڈ ملازمین کو تہوار الاؤنس اور 3,500 روپے ایکس گریشیا بھی دیا جائے گا۔
