لاہور:منہاج القرآن انٹرنیشنل کی سپریم کونسل کے چیئرمین ڈاکٹر حسن محی الدین قادری نے گزشتہ روز ناظم اعلیٰ خرم نواز گنڈاپور و دیگر قائدین کے ہمراہ بغداد ٹائون شہر اعتکاف کا دورہ کیا اور انتظامات کا جائزہ لیا۔ انہوں نے سیکرٹری شہر اعتکاف کو ہدایت کی کہ معتکفین کے آرام اور سکون کا ہر ممکن خیال رکھا جائے ۔
بلاتعطل پینے کے صاف پانی کی فراہمی کا بندوبست کیا جائے۔ایمرجنسی میں ہمہ وقت ڈاکٹر اور طبی عملہ اور ادویات کی دستیابی یقینی بنائی جائے ۔ عبادت و ریاضت کے لئے پر سکون ماحول فراہم کیا جائے۔انہوں نے کہا کہ اعتکاف ایک مسنون عبادت ہے اور اس کا بے اندازہ اجر و ثواب ہے۔
اس موقع پر گفتگو کرتے ہوئے ناظم اعلیٰ خرم نواز گنڈاپور نے کہا کہ منہاج القرآن انٹرنیشنل کے زیر اہتمام آج 20 ویں روزہ شروع ہونے والے اجتماعی اعتکاف میں سنٹرل پنجاب، جنوبی پنجاب کے علاوہ خیبر پختون خواہ، بلوچستان، رورل سندھ، اربن سندھ، آزاد کشمیر، گلگت بلتستان سمیت امریکہ، برطانیہ، یورپ سے معتکفین شریک ہوں گے۔
انہوں نے کہا کہ شیخ الاسلام ڈاکٹر محمد طاہرالقادری ’’عشق الہی اور لذت توحید‘‘کے موضوع پر معتکفین سے خطابات کریں گے۔انہوں نے کہاکہ ہزار ہا خواتین بھی معتکف ہوں گی جن کے لئے علیحدہ سے انتظامات کئے گئے ہیں۔انہوں نے کہا کہ منہاج القرآن انٹرنیشنل کا شہر اعتکاف اصلاح احوال اور روحانی تربیت کے ساتھ ساتھ اتحاد امت کا مظہر ہوتا ہے۔ ملک بھر سے مختلف طبقہ فکر کے افراد شہر اعتکاف کا حصہ بنتے ہیں۔
انہوں نے کہا کہ شہر اعتکاف 10 یوم کے لیے ایک منی پاکستان کا منظر پیش کررہا ہوتا ہے۔پاکستان کے ہر شہر، کلچر اورزبان کے لوگ یہاں اکٹھے ہوتے ہیں۔ معتکفین اللہ اور اس کے رسول ؐ کی نسبت کی شناخت کے ساتھ یہاں جمع ہوتے ہیں ۔منہاج القرآن کا شہر اعتکاف اتحاد امت اور اسلامی اخوت کا عملی پرتو ہوتا ہے۔
