لاہور :وزیراعلیٰ پنجاب نے خصوصی بچوں کے لیے عید کی خوشیوں کو دوبالا کرنے کا فیصلہ کیا ہے۔ صوبے بھر کے خصوصی تعلیمی اداروں میں زیر تعلیم بچوں کو عید گفٹ دینے کا آغاز کر دیا گیا ہے۔ اس مہم کے تحت عید کی تعطیلات سے پہلے 40 ہزار بچوں کو تحائف دینے کا ہدف مقرر کیا گیا ہے۔
وزیراعلیٰ پنجاب کی خصوصی ہدایت پر معاون خصوصی ثانیہ عاشق نے لاہور کے تین خصوصی تعلیمی اداروں کا دورہ کیا اور بچوں میں عید گفٹ تقسیم کیے۔ انہوں نے گورنمنٹ ڈگری کالج برائے سپیشل ایجوکیشن جوہر ٹاؤن میں جاکر باقاعدہ طور پر اس مہم کا افتتاح کیا۔ بعد ازاں وہ گورنمنٹ شاداب انسٹی ٹیوٹ آف سپیشل ایجوکیشن علامہ اقبال ٹاؤن اور گورنمنٹ ڈگری کالج برائے سپیشل ایجوکیشن نشتر ٹاؤن بھی گئیں اور وہاں کے خصوصی طلبہ کو تحائف پیش کیے۔
ثانیہ عاشق نے ہر کلاس روم میں جاکر بچوں کو وزیراعلیٰ مریم نواز شریف کی جانب سے عید گفٹ اور ایک محبت بھرا کارڈ پیش کیا۔ اس موقع پر انہوں نے بچوں کے ساتھ شفقت کا اظہار کیا اور وزیراعلیٰ کا تحریری پیغام بھی پڑھ کر سنایا جس میں خصوصی بچوں کے لیے محبت اور نیک تمناؤں کا اظہار کیا گیا تھا۔
خصوصی طلبہ نے جب یہ تحائف وصول کیے تو ان کے چہروں پر خوشی دیدنی تھی۔ معصوم بچوں نے اپنے انداز میں وزیراعلیٰ مریم نواز شریف کا شکریہ ادا کیا اور خوشی کا اظہار کیا۔ اس موقع پر معاون خصوصی ثانیہ عاشق نے خصوصی تعلیمی ادارے کے لان میں ایک پودا بھی لگایا تاکہ اس یادگار موقع کو ہمیشہ کے لیے محفوظ کیا جا سکے۔
وزیراعلیٰ مریم نواز شریف کا کہنا تھا کہ خصوصی بچوں کو عید گفٹ دے کر ان کی خوشیوں میں شریک ہونا ہمارے لیے باعث فخر ہے۔ انہوں نے مزید کہا کہ پنجاب حکومت خصوصی بچوں کے لیے نئے اور منفرد منصوبے متعارف کروا رہی ہے تاکہ ان کے لیے مزید بہتر مواقع فراہم کیے جا سکیں۔
