لاہور:شہر اعتکاف میں شہدائے ماڈل ٹاؤن کے ورثا کے اعزاز میں افطار ڈنر کا اہتمام کیا گیا، شہدا کے ورثا کو عید پر تحائف دیے گئے، تحائف منہاج القرآن انٹرنیشنل کی سپریم کونسل کے چیئرمین ڈاکٹر حسن محی الدین قادری نے ناظم اعلیٰ خرم نواز گنڈا پور اور طیب ضیا کے ہمراہ دہے، اس موقع پر گفتگو کرتے ہوئے کہا کہ شہدا کو 11 سال گزرنے پر بھی انصاف نہ ملنا تکلیف دہ ہے جہاں سے انصاف اٹھ جاتا ہے وہاں سے اللہ کی برکتیں بھی اٹھ جاتی ہے ۔ انہوں نے کہا کہ 11 سال سے انصاف کے لیے قانونی چارہ جوئی کر رہے ہیں حصول انصاف کے لیے قانونی چارہ جوئی کرتے رہیں گے، چیف جسٹس لاہور ہائی کورٹ اور چیف جسٹس سپریم کورٹ سے استدعا ہے کہ انصاف دیا جائے، دریں اثنا منہاج القرآن انٹرنیشنل کی سپریم کونسل کے چیئرمین ڈاکٹر حسن محی الدین قادری نے سیرتِ انبیاء اور شخصیت سازی کے اصول کے موضوع پر شہر اعتکاف میں تربیتی نشست سے خطاب کرتے ہوئے کہا کہ علم کا نفع عمل سے حاصل ہوتا ہے،رمضان المبارک میں جو سیکھا اس پر سالہا سال عمل کیا جائے، کسی بھی حالت میں نماز پنجگانہ ترک نہ کریں، اپنے اخلاق کی حفاظت کریں، انہوں نے کہا کہ قرآن مجید کو اللہ رب العزت نے رشد و ہدایت والی کتاب بنا کر نازل فرمایا،انسانیت کی راہنمائی کیلئے قرآن مجید میں انبیاء کرام کے واقعات بیان کئے گئے ہیں تاکہ سبق حاصل کیا جاسکے،انھوں نے کہا کہ قرآن مجید سے ہمہ وقت جڑیں رہیں، تلاوت بھی کریں ساتھ ساتھ اس کا ترجمہ بھی دیکھنے کی کوشش کریں, انھوں نے کہا کہ شیخ الاسلام ڈاکٹر محمد طاہر القادری کی تعلیمات ہیں کہ خدمت، اُخوت، فتوعت کو پالو گے تو خداسے جڑے رہو گے۔ صاحب فتوت وہ ہے جو لوگوں کے ساتھ احسان سے پیش آتا ہو، ان کی طرف سے آنے والی تکالیف کو برداشت کرتا ہے اور دوسروں کی پریشانیوں کو دور کرنے کی حتی المقدور کوشش کرتا ہے۔
