لاہور:لاہور کے علاقے جوہر ٹاؤن میں ایک افسوسناک حادثہ پیش آیا، جہاں اسکول وین الٹنے سے 10 معصوم بچے زخمی ہو گئے، تاہم خوش قسمتی سے سب کی حالت خطرے سے باہر ہے۔
تفصیلات کے مطابق لاہور کے علاقے جوہر ٹاؤن میں موڑ کاٹتے ہوئے ایک اسکول وین اُلٹ گئی جس کے نتیجے میں 10 بچے زخمی ہو گئے۔
ریسکیو 1122 کے مطابق ایمرجنسی گاڑیاں فوری طور پر موقع پر پہنچ گئیں اور زخمی بچوں کو ابتدائی طبی امداد دی جا رہی ہے۔
حادثے میں زخمی ہونے والے 5 بچوں کو جائے وقوعہ پر ہی ابتدائی طبی امداد فراہم کی گئی جبکہ باقی 5 بچوں کو مزید علاج کے لیے جناح اسپتال منتقل کر دیا گیا ہے، تاہم تمام بچوں کی حالت خطرے سے باہر بتائی جا رہی ہے۔
پولیس نے وین کے ڈرائیور کو حراست میں لے لیا ہے اور واقعے کی مزید تحقیقات جاری ہیں۔
