ڈی آئی خان:ڈیرہ اسماعیل خان میں سکیورٹی فورسز کا بڑا ایکشن، انتہائی مطلوب دہشت گرد کمانڈر سمیت 9 خوارج مار دیے گئے۔ صدر اور وزیراعظم نے کامیاب آپریشن پر سکیورٹی فورسز کو خراج تحسین پیش کیا۔
تفصیلات کے مطابق ڈیرہ اسماعیل خان کے علاقے ٹکوارہ میں سکیورٹی فورسز نے خفیہ اطلاعات پر کامیاب آپریشن کرتے ہوئے انتہائی مطلوب دہشت گرد کمانڈر سمیت 9 خوارج کو جہنم واصل کر دیا۔
پاک فوج کے شعبہ تعلقات عامہ (آئی ایس پی آر) کے مطابق یہ آپریشن 6 اور 7 اپریل کی درمیانی شب خفیہ اطلاعات کی بنیاد پر کیا گیا۔ کارروائی کے دوران شدید فائرنگ کا تبادلہ ہوا جس میں 9 خوارج مارے گئے۔
آئی ایس پی آر کا کہنا ہے کہ مارے جانے والوں سے بھاری مقدار میں اسلحہ اور گولہ بارود برآمد ہوا ہے۔ ہلاک دہشت گردوں میں خارجی گروہ کا سرغنہ شیرین بھی شامل ہے جو قانون نافذ کرنے والے اداروں کو انتہائی مطلوب تھا۔
ترجمان پاک فوج کے مطابق دہشت گرد شیرین کئی بے گناہ شہریوں کی ٹارگٹ کلنگ میں ملوث رہا اور کیپٹن حسنین اختر کی شہادت کا بھی ذمہ دار تھا۔
آئی ایس پی آر کے مطابق علاقے میں مزید کلیئرنس آپریشن جاری ہے اور سکیورٹی فورسز دہشت گردی کے مکمل خاتمے کے لیے پرعزم ہیں۔
صدر مملکت آصف علی زرداری نے سکیورٹی فورسز کی کامیاب کارروائی پر خراج تحسین پیش کرتے ہوئے کہا کہ دہشت گردوں کے سرغنہ کی ہلاکت سکیورٹی اداروں کی بڑی کامیابی ہے۔ ان کا کہنا تھا کہ دہشت گردوں کے مکمل خاتمے تک فورسز کی کارروائیاں جاری رہیں گی۔
وزیراعظم شہباز شریف نے بھی فتنہ الخوارج کے دہشت گردوں کے خلاف کامیاب آپریشن پر سکیورٹی فورسز کو سراہتے ہوئے کہا کہ پوری قوم دہشت گردی کے خلاف سکیورٹی فورسز کے ساتھ کھڑی ہے اور ملک سے ہر قسم کی دہشت گردی کے مکمل خاتمے کے لیے پرعزم ہیں۔
سکیورٹی فورسز کا بڑا آپریشن، سرغنہ سمیت 9 خوارج جہنم واصل
مارے جانے والوں سے بھاری مقدار میں اسلحہ اور گولہ بارود برآمد ہوا ہے،آئی ایس پی آر
