اسلام آباد :آرمی چیف جنرل سید عاصم منیر نے پاکستان منرل انویسٹمنٹ فورم 2025 سے خطاب کرتے ہوئے کہا کہ مجھے یہ پختہ یقین ہے کہ پاکستان عالمی معدنی معیشت میں ایک اہم رہنما کے طور پر ابھرنے کے لیے تیار ہے۔
انہوں نے کہا کہ ہم عالمی اداروں کو خوش آمدید کہتے ہیں اور چاہتے ہیں کہ وہ اپنی مہارت سے پاکستان کو آگاہ کریں، یہاں سرمایہ کاری کے مواقع تلاش کریں اور اس کی وسیع معدنی صلاحیتوں کی ترقی میں ہمارے ساتھ شراکت داری کریں۔
جنرل سید عاصم منیر نے مزید کہا کہ پاکستان کے معدنی وسائل سے بہتر طور پر استفادہ حاصل کرنے کے لیے انجینئرز، جیالوجسٹ، آپریٹرز اور ماہر کان کنوں کی ضرورت ہے، اسی لیے ہم اس شعبے کی ترقی کے لیے طلبا کو بیرون ملک تربیت دینے کی کوشش کر رہے ہیں۔
انہوں نے بتایا کہ اس وقت بلوچستان کے 27 پاکستانی طلبا زیمبیا اور ارجنٹینا میں معدنیات کے تلاش کے شعبے میں تربیت حاصل کر رہے ہیں۔ ہمارا مقصد اس شعبے کے لیے ماہر افرادی قوت، مہارت اور انسانی وسائل فراہم کرنا ہے۔
آرمی چیف نے کہا کہ اقتصادی سلامتی اب قومی سلامتی کا ایک لازمی جزو بن چکا ہے اور پاک فوج اپنے شراکت داروں اور سرمایہ کاروں کے مفادات اور اعتماد کو تحفظ فراہم کرنے کے لیے ایک مضبوط سیکیورٹی فریم ورک کے تحت فعال اقدامات کرے گی۔
انہوں نے کہا کہ پاکستان میں اپ اسٹریم اور ڈاؤن اسٹریم معدنی صنعتوں کی ترقی کو یقینی بنایا جائے گا، یہ اہم ہے کہ پاکستان میں ریفائننگ اور ویلیو ایڈیشن میں سرمایہ کاری کی جائے تاکہ لاگت کو کم کیا جا سکے اور مارکیٹوں کو متنوع بنایا جا سکے۔
جنرل سید عاصم منیر نے کہا کہ پاکستان میں موجود وسیع معدنی ذخائر، مہارت اور شفاف معدنی پالیسی کے ہوتے ہوئے مایوسی اور بے عملی کا کوئی موقع نہیں، ہمیں آگے بڑھ کر ملک اور اپنے مستقبل کے لیے جدوجہد کرنی ہے۔
آرمی چیف نے کہا کہ ہم اپنے پاکستانی شراکت داروں اور سرمایہ کاروں کو یقین دلاتے ہیں کہ آپ کی مہارت سے فائدہ اٹھانا ہماری مشترکہ قومی خواہش ہے تاکہ کاروبار اور معدنی وسائل سے بہترین استفادہ کیا جا سکے۔
انہوں نے کہا کہ پاکستان ایک قابل اعتماد پارٹنر ہے اور میں بلوچ قبائلی رہنماؤں کی کوششوں کا اعتراف کرتا ہوں جنہوں نے کان کنی کے شعبے کو فروغ دینے اور بلوچستان کی ترقی میں اہم کردار ادا کیا۔
جنرل سید عاصم منیر نے کہا کہ مشترکہ کوششوں سے پاکستان کا معدنی شعبہ علاقائی ترقی، خوشحالی اور پائیداری کو فروغ دینے کے لیے کام کر سکتا ہے۔
