ایک آسٹریلوی خاتون، جو دو سال قبل سنگاپور کے چانگی ایئرپورٹ سے پرفیوم چوری کر چکی تھی، اب گرفتار ہو گئی ہے۔ اس نے عدالت میں روتے ہوئے چوری کا اعتراف کیا اور 750 ڈالر جرمانہ ادا کیا۔
سنگاپور ایئرپورٹ سے پرفیوم چوری کرنے والی 35 سالہ آسٹریلوی خاتون راج ورشا کو دو سال بعد گرفتار کر لیا گیا۔ غیر ملکی میڈیا رپورٹ کے مطابق خاتون نے 22 مارچ 2023 کو چانگی ایئرپورٹ کے ٹرمینل ون کے ڈیپارٹر ٹرانزٹ ایریا کے ایک اسٹور سے تقریباً 250 ڈالر مالیت کی پرفیوم کی بوتل چوری کی تھی۔ جب وہ 31 مارچ 2025 کو ایئرپورٹ پر واپس آئی، تو اسے حراست میں لے لیا گیا، اور امیگریشن اینڈ چیک پوائنٹس اتھارٹی کے افسران نے معاملہ پولیس کو سونپ دیا۔
اسٹیٹ پراسیکیوٹنگ آفیسر (ایس پی او) نے عدالت کو بتایا کہ چوری کے دن خاتون رات 3 بجے کے قریب آسٹریلیا سے چنگی ایئرپورٹ پہنچی، اور رات 4:10 بجے کے قریب وہ ہوائی اڈے کے ٹرمینل 1 کے روانگی ایریا میں موجود ایک ڈیوٹی فری اسٹور میں داخل ہوئی۔ وہاں سے اس نے چینل پرفیوم کی بوتل اٹھائی اور اسے اپنے بیگ میں چھپا لیا۔ بعد میں سیکیورٹی افسر نے بوتل دیکھی اور اسٹور کے ملازمین کو اطلاع دی۔
ایس پی او ذاکر نے بتایا کہ جب خاتون کو پتا چلا کہ چوری کا انکشاف ہو گیا ہے، تو اس نے پرفیوم کی قیمت ادا کیے بغیر اسٹور سے نکل گئی اور صبح 9 بجے اپنے اہل خانہ کے ساتھ تھائی لینڈ کے لیے روانہ ہو گئی۔ اسٹور سپروائزر نے سی سی ٹی وی کیمروں کی فوٹیج دیکھی اور ایئرپورٹ پولیس کو اطلاع دی۔
عدالت کو بتایا گیا کہ خاتون کو 31 مارچ کو بھارت سے ایک پرواز سے سنگاپور واپس آنے پر حراست میں لیا گیا، جب کہ دو سال بعد اس نے 11 اپریل کو ڈسٹرکٹ جج کے سامنے چوری کا اعتراف کیا۔ روتے ہوئے اس نے کہا کہ میں نے جو کچھ کیا، اس کی پوری ذمہ داری لیتی ہوں، مجھے بہت افسوس ہے، میں ٹھیک سے سوچ نہیں پا رہی تھی اور صحیح دماغی حالت میں نہیں تھی۔ اس نے دعویٰ بھی کیا کہ چوری شدہ پرفیوم کی بوتل اس نے اپنی والدہ کو تحفہ کے طور پر دی تھی۔ عدالت نے اس پر 750 ڈالر جرمانہ عائد کیا، حالانکہ چوری کے مرتکب افراد کو 3 سال تک قید اور جرمانے کی سزا بھی ہو سکتی ہے۔
