مینار پاکستان پر 25 دسمبر کو ڈی چوک شہداء کیلئے دعائیہ تقریب ہو گی، کے پی حکومت کا اعلان
پشاور: خیبرپختونخوا حکومت نے ایک بار پھر 25 دسمبر کو مینار پاکستان پر ڈی چوک شہداء کی دعائیہ تقریب کا اعلان کرتے ہوئے مسلم لیگ ن کو چیلنج کیا ہے کہ وہ بھی جلسہ کریں اور ہم بھی کریں گے۔ اس روز آپ کے جلسے سے زیادہ لوگ نکلیں گے اور ثابت کریں گے کہ عوام عمران خان کے ساتھ ہیں۔ یہ اعلان معاون خصوصی سہیل آفریدی نے خیبرپختونخوا اسمبلی کے اجلاس کے دوران کیا۔ انہوں نے کہا کہ 26 نومبر کو نہتے افراد پر گولیاں چلائی گئیں اور یہاں اخلاقی اقدار ختم ہو چکی ہیں، کچھ لوگ دوسروں کے احسانات کے نیچے دب کر حق کی بات تک نہیں کر سکتے۔ ہم اپنا آئینی و قانونی حق لینے ڈی چوک گئے تھے اور اگر عمران خان کو ناحق جیل میں نہ ڈالا گیا ہوتا تو ہم اسلام آباد نہ جاتے۔ پچھلے ڈھائی برس سے ہم انصاف کے لیے قانون کا دروازہ کھٹکھٹا رہے ہیں، لیکن ہمیں انصاف نہیں مل رہا۔ معاون خصوصی نے کہا کہ ہم ججز کو مداخلت کے لیے خطوط لکھ رہے ہیں، اور پی ٹی آئی ورکرز نے مزاحمتی تحریک چلائی جو کسی نے نہیں کی۔ ہماری سیاسی قیادت بے گناہ قید میں ہے۔ انہوں نے مزید کہا کہ 25 دسمبر کو لاہور مینار پاکستان میں شہداء کے لیے دعائیہ تقریب منعقد کی جائے گی اور اس کے مقابلے میں مسلم لیگ ن بھی پنجاب میں جلسہ کرے، اگر ہمارے لوگ زیادہ نہ ہوئے تو وہ استعفیٰ دے دیں گے۔ سہیل آفریدی نے کہا کہ پشتون ہمیشہ ظلم کے خلاف کھڑے ہوئے ہیں، ہم نے کبھی کسی کی غلامی نہیں کی اور وہ لوگ جو ہماری قیمت پر سر بلند ہوئے، آج ہمیں درس دیں گے۔ اجلاس کے دوران جے یو آئی کی رکن صوبائی اسمبلی ریحانہ اسماعیل نے سیکورٹی کے مسائل کی نشاندہی کی جس کے بعد اجلاس کو آج بروز منگل تک کے لیے ملتوی کر دیا گیا۔
