پاکستان کرکٹ ٹیم کے ہیڈ کوچ جیسن گلیسپی نے جنوبی افریقا جانے سے انکار کر دیا ہے، جہاں پاکستان کرکٹ ٹیم کا دورہ جاری ہے۔ اس وقت دونوں ملکوں کے درمیان ٹی ٹوئنٹی سیریز چل رہی ہے، جس کے بعد 3 میچز کی ون ڈے سیریز اور پھر 2 ٹیسٹ میچز کی سیریز بھی ہوگی۔
جیسن گلیسپی کو کل جنوبی افریقا پہنچنا تھا تاکہ وہ پری ٹیسٹ کیمپ کی نگرانی کرتے، لیکن ذرائع کے مطابق انہوں نے جنوبی افریقا جانے سے انکار کر دیا۔ گلیسپی نے پی سی بی کے ریڈ بال ٹیم کے کوچ ٹم نیلسن کے معاہدے میں توسیع نہ ہونے پر یہ فیصلہ کیا۔
ذرائع کا کہنا ہے کہ گلیسپی نے ذاتی وجوہات کی بنا پر جنوبی افریقا نہ جانے کا فیصلہ کیا اور اس بارے میں بورڈ کو آگاہ کیا۔ یاد رہے کہ پاکستان کرکٹ بورڈ نے جیسن گلیسپی کو مستقبل میں مزید ذمے داریاں نہ دینے کا فیصلہ کیا تھا۔
ذرائع کے مطابق، گلیسپی نے بھی گیری کرسٹن کی طرح وقت سے پہلے مستعفی ہونے کا فیصلہ کیا ہے۔ جبکہ وائٹ بال کے عبوری ہیڈ کوچ عاقب جاوید کے لیے ریڈ بال کے ذمے داریاں جاری رکھنے کا امکان ظاہر کیا جا رہا ہے۔
اس سے قبل جمعرات کو یہ خبر سامنے آئی تھی کہ پاکستان کرکٹ بورڈ نے جنوبی افریقا کے خلاف ٹیسٹ سیریز کے لیے ہائی پرفارمنس ریڈ بال کوچ ٹم نیلسن کے معاہدے میں توسیع نہیں کی ہے
