بلاول بھٹو کا وزیراعظم سے ہائی پاور سلیکشن بورڈ میں شمولیت کا مطالبہ
اسلام آباد:پیپلزپارٹی کے چیئرمین بلاول بھٹو زرداری نے وزیراعظم شہباز شریف سے درخواست کی ہے کہ انہیں ہائی پاور سلیکشن بورڈ (ایچ پی ایس بی) کا حصہ بنایا جائے۔ اس مطالبے کی وجہ سے پیر اور منگل کو شیڈول اجلاس ملتوی کر کے جنوری میں منعقد کرنے کا فیصلہ کیا گیا ہے۔
حکومتی ذرائع کے مطابق بلاول بھٹو نے وزیراعظم سے کہا ہے کہ وہ اعلیٰ گریڈ کے افسران کو 21 سے 22 گریڈ میں ترقی دینے کے عمل میں شامل ہونا چاہتے ہیں۔ ان کی درخواست پر غور کرنے کے بعد وزیراعظم شہباز شریف اس معاملے میں حتمی فیصلہ کریں گے۔
ہائی پاور سلیکشن بورڈ کا آخری اجلاس فروری 2023 میں منعقد ہوا تھا۔ نئے اجلاس کو جنوری 2024 میں بلانے کا امکان ہے۔
ذرائع کے مطابق گریڈ 20 اور 21 کے افسران کی ترقی کے حوالے سے سینٹرل سلیکشن بورڈ میں وزرائے اعلیٰ کو شامل کرنے کی تجویز بھی دی گئی تھی، جسے وزیراعظم نے مسترد کر دیا۔ اس کے بجائے سینٹرل سلیکشن بورڈ میں سینیٹر سلیم مانڈوی والا کو شامل کر لیا گیا ہے۔
ماضی میں بھی مختلف سیاسی شخصیات جیسے نوید قمر سینٹرل سلیکشن بورڈ کا حصہ رہ چکی ہیں۔
