جنوبی وزیرستان میں چیک پوسٹ پر حملہ، 16 جوان شہید، 8 خوارج ہلاک
اسلام آباد:جنوبی وزیرستان کے علاقے مکین میں خوارج نے سیکیورٹی فورسز کی چیک پوسٹ پر حملہ کیا، جس میں 16 بہادر سپاہی شہید ہوگئے جبکہ فورسز نے 8 دہشتگردوں کو ہلاک کر دیا۔
تفصیلات کے مطابق پاک فوج کے شعبہ تعلقات عامہ (آئی ایس پی آر) کے مطابق، یہ واقعہ 20 اور 21 دسمبر کی درمیانی شب پیش آیا جب خوارج کے ایک گروہ نے چیک پوسٹ پر حملہ کرنے کی کوشش کی۔ سیکیورٹی فورسز نے بھرپور جوابی کارروائی کرتے ہوئے حملہ ناکام بنایا اور دہشتگردوں کو جہنم واصل کیا۔
آئی ایس پی آر کے مطابق، شدید فائرنگ کے تبادلے میں 16 سپاہیوں نے وطن کے دفاع میں اپنی جانیں قربان کر دیں۔ واقعے کے بعد علاقے میں کلیئرنس آپریشن جاری ہے تاکہ ملوث عناصر کو انصاف کے کٹہرے میں لایا جا سکے۔
وزیراعظم محمد شہباز شریف نے حملے کی شدید مذمت کرتے ہوئے شہداء کی قربانیوں کو خراج عقیدت پیش کیا۔ انہوں نے کہا کہ یہ جوان ملک کی حفاظت کے لیے سیسہ پلائی دیوار کی مانند کھڑے ہیں۔ وزیراعظم نے شہداء کے درجات کی بلندی کی دعا کی اور لواحقین سے اظہار تعزیت کیا۔
وزیر داخلہ محسن نقوی نے شہداء کے اہل خانہ سے گہری ہمدردی کا اظہار کرتے ہوئے کہا کہ یہ بہادر سپاہی قوم کے ہیرو ہیں، جنہوں نے وطن کے امن کے لیے اپنی جانیں نچھاور کیں۔ انہوں نے مزید کہا کہ شہداء کی قربانیاں ہمیشہ یاد رکھی جائیں گی اور ان کے خاندانوں کے ساتھ کھڑے رہیں گے۔
شہداء کی تفصیلات
لانس نائیک لیاقت علی شہید (30 سال) کا تعلق ضلع کرم سے تھا۔ انہوں نے 11 سال پاک فوج میں خدمات انجام دیں۔
لانس نائیک محمد اسحاق شہید (31 سال) ضلع کرک کے رہائشی تھے۔ وہ 9 سال تک پاک فوج کا حصہ رہے۔
حوالدار ایوب خان شہید (38 سال) ضلع اٹک سے تعلق رکھتے تھے اور 15 سال تک پاک فوج میں خدمات سرانجام دیں۔
حوالدار عمر حیات شہید (40 سال) ضلع کوہاٹ کے رہائشی تھے۔ وہ 17 سال پاک فوج میں وطن کی حفاظت کرتے رہے۔
سپاہی محبوب رحمان شہید (26 سال) ضلع ٹانک سے تعلق رکھتے تھے۔ انہوں نے 8 سال پاک فوج میں خدمات انجام دیں۔
حوالدار محمد حیات شہید (37 سال) ضلع بنوں کے رہنے والے تھے اور 17 سال تک پاک فوج میں خدمات سرانجام دیں۔
لانس نائیک شیر محمد شہید (26 سال) کا تعلق ضلع مالاکنڈ سے تھا۔ وہ 7 سال تک پاک فوج کا حصہ رہے۔
سپاہی احسان الحق شہید (22 سال) ضلع لوئر دیر کے رہائشی تھے۔ انہوں نے 4 سال پاک فوج میں خدمات انجام دیں۔
سپاہی جنید شہید (25 سال) ضلع خیبر سے تعلق رکھتے تھے۔ انہوں نے 3 سال پاک فوج میں خدمات انجام دیں۔
لانس نائیک حامد علی شہید (29 سال) ضلع صوابی کے رہنے والے تھے اور 8 سال پاک فوج میں خدمات انجام دیں۔
سپاہی کلیم اللہ شہید (26 سال) ضلع لکی مروت کے رہائشی تھے۔ انہوں نے 3 سال پاک فوج میں خدمات انجام دیں۔
حوالدار طاہر محمود شہید (41 سال) ضلع کوہاٹ سے تعلق رکھتے تھے اور 18 سال تک پاک فوج کا حصہ رہے۔
لانس نائیک مصور شاہین شہید (29 سال) ضلع کوہاٹ کے رہائشی تھے۔ انہوں نے 7 سال پاک فوج میں خدمات انجام دیں۔
سپاہی فیض محمد شہید (22 سال) ضلع مانسہرہ سے تعلق رکھتے تھے۔ وہ 4 سال تک پاک فوج میں خدمات سرانجام دیتے رہے۔یہ تمام بہادر سپاہی اپنے وطن کے لیے جان کا نذرانہ پیش کر کے قوم کے ہیرو بن گئے۔
