بھارتی فلم پشپا 2 کا پولیس پر طنزیہ گانا تنازع کا شکار ہوکر یوٹیوب سے ڈیلیٹ کردیا گیا. ٹالی ووڈ کے معروف اداکار الو ارجن کی بلاک بسٹر فلم پشپا 2 دا رول کا پولیس پر طنز کرنے والا مشہور گانا دممنٹے پٹکورا تنازع کے باعث یوٹیوب سے ہٹا دیا گیا ہے۔
بھارتی میڈیا رپورٹس کے مطابق یہ گانا فلم کا حصہ نہیں تھا لیکن مداحوں نے اسے بہت پسند کیا۔ ٹی سیریز نے 24 دسمبر کو یہ گانا یوٹیوب پر ریلیز کیا تھا، تاہم چند گھنٹوں کے اندر ہی سنیما بھگدڑ کیس کے تناظر میں اسے پلیٹ فارم سے ڈیلیٹ کرنا پڑا۔
یہ گانا فلم کے ایک منظر سے متاثر تھا جس میں فہد فاضل کا کردار، بھنور سنگھ شیخاوت، الو ارجن کے کردار پشپا راج کو چیلنج کرتا ہے۔ منظر میں بھنور کہتا ہے، اگر ہمت ہے تو پکڑو شیخاوت، پکڑ لو گے تو سنڈیکیٹ چھوڑ دوں گا۔ بعد میں اس مکالمے کو ریمکس گانے کی شکل میں پیش کیا گیا جس پر ڈانس کیا گیا تھا۔
گانے کی ریلیز کے بعد یہ سوشل میڈیا پر بحث کا موضوع بن گیا۔ کچھ لوگوں نے اسے مزاحیہ قرار دیا جبکہ دیگر نے اس وقت گانے کی ریلیز کو غیر مناسب کہا، خاص طور پر اس وقت جب الو ارجن خود ریاستی حکومت اور پولیس کے ساتھ قانونی مسائل میں گھرے ہوئے تھے۔
تنازع کے بڑھنے کے خدشے کو دیکھتے ہوئے، ٹی سیریز نے فوری طور پر یہ گانا یوٹیوب اور دیگر ڈیجیٹل پلیٹ فارمز سے ہٹا دیا تاکہ کسی قسم کی مزید مشکلات سے بچا جا سکے۔
