پاکستان ٹیلی کمیونیکیشن اتھارٹی نے عوام کو آگاہ کیا ہے کہ قطر کے قریب واقع زیر سمندر کیبل میں خرابی کی وجہ سے ملک میں انٹرنیٹ سروس متاثر ہونے کا امکان ہے۔ متعلقہ ٹیمیں اس خرابی کو ختم کرنے کے لیے کام کر رہی ہیں۔
اسلام آباد:پاکستان ٹیلی کمیونیکیشن اتھارٹی (پی ٹی اے) نے عوام کو خبردار کیا ہے کہ قطر کے قریب زیر سمندر کیبل میں خرابی کی وجہ سے ملک میں انٹرنیٹ سروس متاثر ہونے کا خدشہ ہے۔
پی ٹی اے نے بتایا کہ قطر کے قریب زیر سمندر کیبل اے اے ای-1 میں خرابی کی اطلاع ملی ہے۔ یہ کیبل پاکستان کی بین الاقوامی انٹرنیٹ ٹریفک کے لیے استعمال ہونے والی سات کیبلز میں سے ایک ہے۔
پی ٹی اے کے مطابق، اس خرابی کی وجہ سے ملک بھر میں انٹرنیٹ اور براڈ بینڈ صارفین کی سروس متاثر ہو سکتی ہے، اور اس خرابی کو دور کرنے کے لیے متعلقہ ٹیمیں کام کر رہی ہیں۔
پاکستان ٹیلی کمیونیکیشن اتھارٹی کا کہنا ہے کہ پی ٹی اے صورت حال کی نگرانی کر رہی ہے اور صارفین کو جاری اپڈیٹس فراہم کرتی رہے گی۔
پی ٹی اے نے صارفین سے تعاون کی درخواست کرتے ہوئے کہا ہے کہ براہ کرم سروس کی بحالی تک تحمل کا مظاہرہ کریں۔
