جمائما اپنے دوستوں کے ساتھ جنوبی افریقا کی مشہور پہاڑی پر ہائیکنگ کر رہی تھیں، جو سطح سمندر سے 2000 فٹ کی بلندی پر واقع ہے
کیپ ٹاؤن:عمران خان کی سابقہ اہلیہ، جمائما گولڈ اسمتھ، ہائیکنگ کے دوران ایک پہاڑی سے گر کر زخمی ہو گئیں۔عالمی خبر رساں ادارے کے مطابق یہ حادثہ جنوبی افریقا کے ایک تفریحی مقام پر پیش آیا جہاں وہ نئے سال کی تقریبات منانے آئی تھیں۔
تفصیلات کے مطابق جمائما اپنے دوستوں کے ساتھ جنوبی افریقا کی مشہور پہاڑی پر ہائیکنگ کر رہی تھیں، جو سطح سمندر
سے2000فٹ کی بلندی پر واقع ہے۔
وہ جب اس پہاڑی کی چوٹی سے نیچے اترنے کی کوشش کر رہی تھیں، پھسل کر زمین پر گر گئیں، جس سے ان کے کندھے، ٹخنے اور پاؤں میں چوٹیں آئی ہیں۔
زخمی حالت میں انہیں کیپ ٹاؤن کے ایک اسپتال منتقل کر دیا گیا ہے، جہاں ان کی حالت اب خطرے سے باہر بتائی گئی ہے۔
اپنی انسٹاگرام پوسٹ میں، جمائما نے لکھا کہ وہ حادثے سے پہلے قدرتی مناظر سے لطف اندوز ہو رہی تھیں۔
اس پوسٹ میں اب تک کی کچھ تصاویر بھی شامل ہیں، جن میں وہ اسپتال کے بستر پر نظر آ رہی ہیں، اور زخمی دائیں پاؤں میں حفاظتی جوتے بھی پہنے ہوئے ہیں۔
ایک اور تصویر میں، وہ بیساکھیوں کے ساتھ کھڑی ہیں، حالانکہ درد کے باوجود مسکرا رہی ہیں۔
اپنی صحت کی صورتحال کے بارے میں آگاہ کرتے ہوئے، جمائما گولڈ اسمتھ نے کہا کہ وہ جلد ہی صحت یاب ہو رہی ہیں اور سب کا شکریہ ادا کیا۔
یہ بات یاد رہے کہ جمائما اور عمران خان کی شادی 1995 میں ہوئی، اور دونوں کے دو بیٹے ہیں، سلیمان اور قاسم۔ دونوں کے درمیان طلاق 2004 میں ہوئی تھی، اور جمائما اپنے بیٹوں کے ساتھ لندن میں مقیم ہیں۔
