اسلام آباد: حکومت اور اپوزیشن کی باہمی اتفاق رائے سے پاکستان تحریک انصاف (پی ٹی آئی) کے رکن جنید اکبر خان کو قومی اسمبلی کی پبلک اکاؤنٹس کمیٹی (پی اے سی) کا بلا مقابلہ چیئرمین منتخب کر لیا گیا۔
پبلک اکاؤنٹس کمیٹی کا اجلاس اسپیشل سیکریٹری محمد مشتاق کی سربراہی میں ہوا۔ اجلاس میں حکمران جماعت مسلم لیگ (ن) کے ڈاکٹر طارق فضل چوہدری، قائد حزب اختلاف عمر ایوب اور شبلی فراز نے جنید اکبر خان کے نام کی تجویز پیش کی۔
مسلم لیگ (ن) کے سینیٹر افنان اللہ خان اور قاسم نون سمیت دیگر اراکین نے بھی اس تجویز کی حمایت کی۔ پی ٹی آئی کے ریاض فتیانہ اور مسلم لیگ (ن) کے تمام اراکین نے جنید اکبر کی بلا مقابلہ حمایت کی، جس کے بعد انہیں چیئرمین پی اے سی منتخب کر لیا گیا۔
منتخب ہونے کے بعد جنید اکبر خان نے تمام اراکین کا شکریہ ادا کرتے ہوئے کہا کہ ان کی خواہش تھی کہ شیخ وقاص اکرم چیئرمین پی اے سی بنیں۔ انہوں نے اعتراف کیا کہ وہ 11 سال سے رکن اسمبلی ہیں لیکن انہیں پی اے سی کا کوئی تجربہ نہیں ہے۔
انہوں نے مزید کہا کہ وہ ساتھی اراکین کے تعاون سے اپنی ذمہ داریاں احسن انداز میں انجام دینے کی پوری کوشش کریں گے۔ ان کا کہنا تھا کہ وہ حکومت اور اپنی جماعت کے شکر گزار ہیں اور قائد کی دی گئی ذمہ داری کو بہتر طریقے سے نبھانے کی کوشش کریں گے۔
حکومت اور پی ٹی آئی کے درمیان چیئرمین پی اے سی کے لیے شیخ وقاص اکرم کے بجائے جنید اکبر کے نام پر اتفاق ہوا۔ تحریک انصاف نے نئے پینل میں شیخ وقاص اکرم کا نام نکال کر عادل بازئی کا نام شامل کیا تھا۔
چیف وہپ ڈاکٹر طارق فضل چوہدری نے بتایا کہ حکومت اور پی ٹی آئی کے درمیان حتمی مشاورت کے بعد جنید اکبر کے نام پر متفق ہوا گیا۔
اسپیکر قومی اسمبلی نے اپوزیشن کو چیئرمین پی اے سی کے انتخاب سے متعلق آگاہ کیا تھا اور پی اے سی کے اراکین کو اسلام آباد میں موجود رہنے کی ہدایت دی تھی۔ حتمی مشاورت کے بعد پی اے سی کا اجلاس طلب کیا گیا، جہاں جنید اکبر خان کو متفقہ طور پر چیئرمین منتخب کیا گیا۔
