پنجاب کے محکمہ تعلیم نے دہم جماعت کی مطالعہ پاکستان کی کتاب میں نمایاں خواتین پر ایک خصوصی مضمون شامل کیا ہے۔
سیکرٹری اسکولز ایجوکیشن خالد نذیر وٹو کے مطابق، اس مضمون میں ان خواتین کا ذکر کیا گیا ہے جنہوں نے اپنے اپنے شعبوں میں نمایاں مقام حاصل کیا۔
ان خواتین میں محترمہ فاطمہ جناح، بینظیر بھٹو، اور نصرت بھٹو کے نام شامل ہیں۔ اس کے علاوہ بیگم کلثوم نواز، مریم نواز، جسٹس عالیہ نیلم، فہمیدہ مرزا، بلقیس ایدھی، شمشاد اختر، نگار جوہر، ثمینہ بیگ، اور ارفع کریم کے نام بھی اس مضمون کا حصہ ہیں۔
خالد نذیر وٹو نے کہا کہ یہ خواتین طالبات کے لیے مشعلِ راہ ہیں۔ ان کی کامیابیوں کو نصاب میں شامل کرنے کا مقصد بچیوں کی حوصلہ افزائی اور ان کی رہنمائی کرنا ہے۔
