پاکستان کے مشہور اداکار، گلوکار اور میزبان فخر عالم کے گھر چوری کی واردات پیش آئی، جس پر انہوں نے شدید مایوسی کا اظہار کیا ہے۔
فخر عالم نے سماجی رابطے کی ویب سائٹ ایکس پر پوسٹ کرتے ہوئے بتایا کہ ان کے کراچی والے گھر کو چوروں نے لوٹ لیا ہے۔ انہوں نے لکھا کہ پولیس موقع پر پہنچ کر تحقیقات کر رہی ہے۔
پولیس کے مطابق، فخر عالم کے گھر پر تعینات معمر چوکیدار کو کسی نامعلوم شخص نے نشہ آور کھانے کی پیشکش کی، جسے کھانے کے بعد وہ بے ہوش ہوگیا۔ اس کے بعد 3 سے 4 چور گھر میں داخل ہوئے اور الماریوں سمیت دیگر سامان کی تلاشی لی۔
چوروں نے گھر میں موجود تجوری کو بھی توڑنے کی کوشش کی، تاہم پولیس نے سی سی ٹی وی فوٹیج حاصل کرلی ہے اور ملزمان کی تلاش شروع کردی گئی ہے۔
اداکار نے کہا کہ چیزوں کا نقصان ان کے لیے اتنا اہم نہیں، لیکن ذہنی سکون سب سے زیادہ قیمتی ہے۔ انہوں نے امید ظاہر کی کہ چور جلد گرفتار کرلیا جائے گا۔
فخر عالم نے لوگوں کو مزید چوکنا رہنے کی ہدایت کی اور کہا کہ یہ واقعہ ان کے لیے بہت پریشان کن ہے۔
سوشل میڈیا پر فخر عالم کے مداحوں نے چوری کی واردات پر افسوس کا اظہار کرتے ہوئے اس کی شدید مذمت کی ہے اور مطالبہ کیا ہے کہ چوروں کو جلد پکڑا جائے۔
