وفاقی حکومت کی جانب سے ملازمت پیشہ افراد پر ٹیکسوں میں مزید اضافے کا امکان ظاہر کیا جا رہا ہے، جبکہ مالی سال 2024-25 میں اس طبقے سے مجموعی طور پر 570 ارب روپے ٹیکس وصول کیے جانے کی توقع ہے۔
رپورٹ کے مطابق رواں مالی سال کے دوران تنخواہ دار طبقہ گزشتہ سال کے مقابلے میں 55 فیصد زیادہ ٹیکس ادا کرے گا، جو اس طبقے پر مزید مالی دباؤ کا باعث بن سکتا ہے۔
ایف بی آر کے فراہم کردہ اعداد و شمار کے مطابق گزشتہ مالی سال میں ملازمت پیشہ افراد نے قومی خزانے میں 368 ارب روپے ٹیکس کی مد میں جمع کرائے، جبکہ رواں مالی سال کے ابتدائی 6 ماہ میں 243 ارب روپے وصول کیے جا چکے ہیں۔
مزید برآں، گزشتہ سال کے پہلے 6 ماہ کے مقابلے میں اس سال ملازمین سے 300 فیصد زیادہ ٹیکس وصول کیا گیا ہے، جو ٹیکس پالیسی میں واضح تبدیلی کی نشاندہی کرتا ہے۔
اعداد و شمار کے مطابق، پانچ سال قبل تنخواہ دار طبقے سے سالانہ ٹیکس وصولی محض 129 ارب روپے تھی۔ مالی سال 2019-20 میں 129 ارب، 2020-21 میں 152 ارب، جبکہ 2021-22 میں ٹیکس وصولی بڑھ کر 189 ارب روپے تک پہنچ گئی۔
رپورٹ میں مزید بتایا گیا کہ مالی سال 2022-23 میں ملازمت پیشہ طبقے سے 264 ارب روپے ٹیکس وصول کیا گیا، جس کے بعد یہ طبقہ ملک میں ٹیکس ادا کرنے والا تیسرا بڑا شعبہ بن چکا ہے۔
