کراچی:سال 2025 کے ابتدائی دو ماہ میں کراچی میں اسٹریٹ کرائم کے 10,356 واقعات رپورٹ ہوئے۔ پولیس رپورٹ کے مطابق اس دوران ڈکیتی کی مزاحمت پر 12 شہری جاں بحق اور 41 زخمی ہوئے۔ مزید بتایا گیا کہ 2,806 افراد سے موبائل فون چھینے گئے، جبکہ شہر میں 306 گاڑیاں اور 7,244 موٹر سائیکلیں چوری یا چھینی گئیں۔
اعداد و شمار کے مطابق، روزانہ کی بنیاد پر موبائل فون چھیننے کے اوسطاً 48.4، گاڑیوں کی چوری اور چھیننے کے 5.3 اور موٹر سائیکلوں کے چھیننے و چوری کے 124.9 واقعات پیش آئے۔
پولیس کے مطابق سال 2024 کے پہلے دو ماہ میں اسٹریٹ کرائم کے 14,419 واقعات رپورٹ ہوئے تھے۔ اس طرح، 2024 کے ابتدائی دو ماہ کے مقابلے میں رواں برس اسٹریٹ کرائم کی شرح میں 28.18 فیصد کمی دیکھنے میں آئی ہے۔
پولیس حکام کا کہنا ہے کہ 2024 کے ابتدائی دو ماہ میں ڈکیتی مزاحمت پر 32 شہری قتل اور 99 زخمی ہوئے تھے۔ گزشتہ برس جنوری اور فروری میں 4,120 موبائل فون چھینے گئے، جبکہ 335 گاڑیاں اور 9,964 موٹر سائیکلیں چوری یا چھینی گئی تھیں۔
