اسلام آباد میں تحریک انصاف کے منحرف رہنما اکبر ایس بابر نے دعویٰ کیا ہے کہ پی ٹی آئی ایک غیر قانونی تنظیم ہے اور اس کے بینک اکاؤنٹس فوری طور پر منجمد کیے جائیں۔ وہ الیکشن کمیشن میں پی ٹی آئی انٹرا پارٹی الیکشن کیس کی سماعت کے بعد میڈیا سے گفتگو کر رہے تھے۔
تفصیلات کے مطابق اکبر ایس بابر نے کہا کہ گزشتہ سماعتوں کی طرح آج بھی وہ تمام دلائل دینے کے لیے تیار تھے، لیکن ایک بار پھر کیس کو عید کے بعد تک ملتوی کر دیا گیا ہے۔ انہوں نے لاہور ہائی کورٹ کے فیصلے کا حوالہ دیتے ہوئے کہا کہ کیس کی کارروائی کو روکا نہیں جا سکتا۔
اکبر ایس بابر نے مزید کہا کہ انہیں خدشہ ہے کہ کہیں الیکشن کا وقت نہ آ جائے اور کیس کا فیصلہ نہ ہو سکے۔ ان کا کہنا تھا کہ پی ٹی آئی کی جانب سے جو گزارشات پیش کی جاتی ہیں، ان کا انہیں خود بھی علم نہیں ہوتا۔ یہ کیسے ورکرز کو ان کے حقوق دینے کا دعویٰ کرتے ہیں، جبکہ یہ خود ایک غیر قانونی تنظیم ہیں؟”
انہوں نے مزید کہا کہ پی ٹی آئی محض جمہوریت کے فروغ کا ڈھونگ رچا رہی ہے اور ان کے اکاؤنٹس کو فوری طور پر منجمد کرنے کی درخواست کی گئی ہے۔
