لاہور:مشہور اداکارہ نیلم منیر، جو حال ہی میں دبئی میں محمد راشد کے ساتھ رشتہ ازدواج میں منسلک ہوئی ہیں، نے شادی کے بعد شوبز میں واپسی کا اعلان کر دیا ہے۔
نیلم منیر نے انسٹاگرام پر اپنی ایک نئی تصویر شیئر کرتے ہوئے شادی کی مبارکباد دینے اور دعائیں کرنے والوں کا شکریہ ادا کیا۔ انہوں نے بتایا کہ وہ اب پہلے کی طرح اداکاری کے لیے مکمل طور پر تیار ہیں۔
واضح رہے کہ شادی کی مصروفیات کی وجہ سے نیلم نے کچھ وقت کے لیے انڈسٹری سے وقفہ لیا تھا۔ تاہم، اب وہ دوبارہ اداکاری کے لیے پرجوش دکھائی دے رہی ہیں اور اپنی نئی تصویر کے ساتھ یہ خوشخبری شیئر کی ہے۔
انہوں نے لکھا، "میں نے شادی کے بعد شاندار وقت گزارا، اور اب نئی سوچ اور جذبے کے ساتھ کام کرنے کو تیار ہوں۔” نیلم نے یہ بھی کہا کہ اداکاری کی بدولت انہیں بے پناہ محبت ملی، اور وہ دوبارہ کام کر کے اس محبت کو مزید بڑھانا چاہتی ہیں۔
نیلم نے اپنے مداحوں، قریبی رشتہ داروں، دوستوں، اور انڈسٹری کے ساتھیوں کا بھی شکریہ ادا کیا، جنہوں نے انہیں ہر موقع پر سپورٹ کیا۔
یہ بھی یاد رہے کہ نیلم منیر نے دبئی میں پاکستانی نژاد محمد راشد کے ساتھ محبت کی شادی کی ہے۔ ان کے شوہر دبئی پولیس کے کرائم انویسٹی گیشن ڈیپارٹمنٹ میں افسر کے طور پر خدمات انجام دے رہے ہیں۔
