بھارتی گلوکار سونو نگم نے کولکتہ میں اپنے کنسرٹ کے دوران مداحوں کے رویے پر ناراضگی کا اظہار کیا اور شور مچانے والوں کو شو چھوڑ کر جانے کا کہہ دیا۔ بھارتی میڈیا رپورٹس کے مطابق، سونو نگم کی پرفارمنس کے دوران ایک غیر متوقع صورتحال پیدا ہوئی، جس کے بعد انہیں خود سامعین کو کنٹرول کرنا پڑا۔
کچھ مداحوں کے کھڑے ہونے پر سونو نگم نے انہیں بیٹھنے کی ہدایت دی اور کہا، "اگر کھڑے ہونے کا اتنا شوق ہے تو الیکشن میں کھڑے ہو جاؤ۔ براہ کرم بیٹھ جاؤ، وقت ضائع ہو رہا ہے۔ یا تو بیٹھ جاؤ یا جگہ خالی کر دو۔”
اس واقعے کی ویڈیو سوشل میڈیا پر وائرل ہو رہی ہے، جس پر صارفین کا ردعمل ملا جلا ہے۔ کچھ صارفین نے سونو نگم کے رویے کی حمایت کی، جبکہ کچھ نے کنسرٹ کی انتظامیہ پر تنقید کی۔ ایک صارف نے کہا کہ انتظامیہ کی نااہلی کی وجہ سے سونو نگم کو خود معاملات سنبھالنے پڑے۔ دوسری طرف، ایک اور صارف نے بتایا کہ وہ اس واقعے کے عینی شاہد تھے اور سونو نگم غصے میں نہیں تھے، بلکہ وہ سامعین کو نظم و ضبط قائم رکھنے کی تلقین کر رہے تھے۔ انہوں نے یہ بھی کہا کہ کولکتہ پولیس اس موقع پر بے حس تماشائی بنی رہی۔
سونو نگم کے اس اقدام پر سوشل میڈیا پر بحث جاری ہے، جہاں کچھ لوگ ان کے رویے کو درست قرار دے رہے ہیں، جبکہ کچھ کا خیال ہے کہ کنسرٹ کی انتظامیہ کو اس معاملے کو بہتر طریقے سے سنبھالنا چاہیے تھا۔
