بالی ووڈ کے مشہور اداکار اکشے کمار نے انکشاف کیا ہے کہ انہیں سپرہٹ فلم "بھول بھلیاں” کے سیکوئل سے نکالا گیا تھا۔
بھارتی میڈیا رپورٹس کے مطابق، حالیہ دنوں اکشے کمار نے ایک ایونٹ میں مداحوں کے سوالات کے دلچسپ جوابات دیے۔ اس دوران انہوں نے کامیڈی فلموں میں کم نظر آنے اور "بھول بھلیاں” کے سیکوئلز میں شامل نہ ہونے کی وجہ بھی واضح کی۔
ایک مداح نے ان سے سوال کیا کہ وہ پچھلے دس سالوں میں کامیڈی فلموں میں کم کیوں دکھائی دیے؟ اس پر اکشے کمار نے کہا کہ یہ سچ ہے کہ حالیہ برسوں میں انہوں نے زیادہ تر سماجی موضوعات پر مبنی فلموں پر کام کیا۔ انہوں نے وضاحت کی کہ وہ کامیڈی کے شعبے میں کافی کام کر چکے تھے اور کچھ نیا کرنے کے لیے سماجی مسائل پر مبنی کہانیوں کو ترجیح دی۔
اکشے کمار نے یہ بھی بتایا کہ اب وہ دوبارہ کامیڈی فلموں کی طرف واپس آ رہے ہیں۔ اس وقت وہ تین بڑی کامیڈی فلموں "بھوت بنگلا”، "ویلکم” اور "ہاؤس فل 5” کی شوٹنگ میں مصروف ہیں۔
جب ان سے "بھول بھلیاں” کے سیکوئلز میں شامل نہ ہونے کی وجہ پوچھی گئی، تو انہوں نے انکشاف کیا کہ انہیں اس فلم کے سیکوئل سے نکال دیا گیا تھا۔ تاہم، اکشے نے یہ نہیں بتایا کہ انہیں نکالنے کی وجہ کیا تھی۔
