میڈرڈ ( خصوصی رپورٹ: غلام مرتضیٰ)عالمی شہرت یافتہ کولمبین گلوکارہ Shakira کو ہسپانوی عدالت نے ٹیکس فراڈ کیس میں بری قرار دیتے ہوئے ان کے حق میں بڑا فیصلہ سنا دیا۔
رپورٹس کے مطابق اسپین کی ہائی کورٹ نے حکم دیا ہے کہ شکیرا سے جرمانے کی مد میں وصول کی گئی 6 کروڑ یورو سے زائد رقم سود سمیت واپس کی جائے۔
عدالت نے اپنے فیصلے میں قرار دیا کہ پیش کیے گئے شواہد کی بنیاد پر گلوکارہ کے خلاف عائد ٹیکس فراڈ کے الزامات ثابت نہیں ہو سکے۔
عدالتی دستاویزات کے مطابق شکیرا پر الزام تھا کہ انہوں نے 2012 سے 2014 کے دوران اسپین میں اپنی آمدن پر درست ٹیکس ادا نہیں کیا اور تقریباً 14.5 ملین یورو کی ٹیکس چوری کی گئی۔
استغاثہ کا مؤقف تھا کہ اس عرصے کے دوران شکیرا اسپین میں مقیم تھیں مگر انہوں نے اپنی ٹیکس رہائش کسی اور ملک میں ظاہر کی۔
دوسری جانب شکیرا مسلسل خود کو بے قصور قرار دیتی رہی ہیں۔
گلوکارہ نے فیصلے کے بعد اپنے بیان میں کہا کہ وہ اپنے بچوں کے ساتھ پُرامن زندگی گزارنا چاہتی ہیں اور نہیں چاہتیں کہ ان کے بیٹے اپنی والدہ کو طویل قانونی جنگ میں الجھا ہوا دیکھیں۔
شکیرا کے مطابق اس مقدمے نے انہیں ذہنی دباؤ اور جذباتی مشکلات سے دوچار رکھا، تاہم اب یہ مرحلہ ختم ہو چکا ہے۔
انہوں نے یہ بھی مؤقف اختیار کیا کہ 2014 تک ان کی زیادہ تر آمدن عالمی میوزک ٹورز سے حاصل ہوتی تھی اور وہ اس دوران زیادہ وقت اسپین سے باہر گزارتی تھیں۔
شکیرا کے مطابق انہوں نے 2015 میں اسپین کو اپنی مستقل ٹیکس رہائش قرار دیا تھا جبکہ وہ پہلے ہی 17.2 ملین یورو ٹیکس ادا کر چکی تھیں۔
عدالتی فیصلے کے بعد یہ معاملہ قانونی طور پر شکیرا کے حق میں نمٹ گیا ہے، جس کے بعد دنیا بھر میں ان کے مداح خوشی کا اظہار کر رہے ہیں۔
سینئر صحافی غلام مرتضیٰ کے مطابق شکیرا کیس عالمی شہرت یافتہ شخصیات اور ٹیکس قوانین کے درمیان پیچیدہ تعلق کی ایک بڑی مثال بن گیا تھا۔
غلام مرتضیٰ کا کہنا ہے کہ یورپی ممالک میں ٹیکس قوانین انتہائی سخت ہیں اور عالمی شخصیات اکثر اپنی رہائش، آمدن اور کاروباری سرگرمیوں کے باعث قانونی تنازعات کا شکار ہو جاتی ہیں۔
انہوں نے کہا کہ شکیرا کے حق میں آنے والا فیصلہ ان کیلئے قانونی اور نفسیاتی دونوں حوالوں سے بڑی کامیابی تصور کیا جا رہا ہے۔
ان کے مطابق اس کیس نے یہ بحث بھی دوبارہ زندہ کر دی ہے کہ عالمی فنکاروں کیلئے مختلف ممالک کے ٹیکس قوانین کس حد تک پیچیدہ ہو چکے ہیں۔
عوامی ردعمل
سوشل میڈیا پر شکیرا کے مداحوں نے فیصلے پر خوشی اور اطمینان کا اظہار کیا۔
کئی صارفین نے اسے “انصاف کی جیت” قرار دیا جبکہ بعض افراد نے شکیرا کی استقامت اور حوصلے کی تعریف کی۔
مداحوں کی بڑی تعداد نے کہا کہ اب گلوکارہ کو اپنی نجی زندگی اور موسیقی پر توجہ دینی چاہیے۔
دوسری جانب کچھ قانونی ماہرین نے اس فیصلے کو اسپین کے ٹیکس نظام کیلئے بھی اہم قرار دیا۔
تجزیہ نگار کیا کہتے ہیں؟
قانونی ماہرین کے مطابق عالمی شہرت یافتہ شخصیات کے ٹیکس کیسز اکثر پیچیدہ بین الاقوامی قوانین سے جڑے ہوتے ہیں، اسی لیے ایسے مقدمات برسوں جاری رہتے ہیں۔
ماہرین کا کہنا ہے کہ شکیرا کیس کے فیصلے سے مستقبل میں دیگر بین الاقوامی ٹیکس مقدمات پر بھی اثر پڑ سکتا ہے۔
تجزیہ نگاروں کے مطابق اس فیصلے کے بعد شکیرا اپنی پیشہ ورانہ سرگرمیوں پر مزید توجہ مرکوز کر سکیں گی۔
