آرٹیفیشل انٹیلی جنس سے پاکستان کیخلاف سازش کی جارہی ہے: وزیراعلیٰ بلوچستان
کوئٹہ:وزیراعلیٰ بلوچستان میر سرفراز بگٹی نے کہا ہے کہ بیرون ملک بیٹھ کر پاکستان کے خلاف آرٹیفیشل انٹیلی جنس کے ذریعے منظم سازش کی جا رہی ہے۔ کوئٹہ کے گرلز کالج میں اسکوٹیاں تقسیم کرنے کی تقریب سے خطاب کرتے ہوئے انہوں نے کہا کہ سوشل میڈیا پر پاکستان کے خلاف پروپیگنڈہ کیا جا رہا ہے اور اس جھوٹے پروپیگنڈے کا مقابلہ کرنے میں طلبہ کی اہم ذمہ داری ہے۔ ان کا کہنا تھا کہ نئی نسل کی مدد کے بغیر ہم اس سازش کا مقابلہ نہیں کر سکتے۔
وزیراعلیٰ نے مزید کہا کہ آج بلوچستان میں میرٹ پر بھرتیاں کی جا رہی ہیں اور یہ عمل صوبے میں کرپشن کے خاتمے کی جانب ایک قدم ہے۔ انہوں نے طالبات کو یقین دلایا کہ اگر وہ آگے بڑھیں تو ہم سب مل کر بلوچستان کو ترقی کی راہ پر گامزن کریں گے۔
انہوں نے اس موقع پر یہ بھی کہا کہ انہوں نے جو وعدہ کیا تھا، وہ ایک ہفتے میں پورا کر دیا۔ اس کے علاوہ، وہ چاہتے ہیں کہ تمام کالجز میں اسکوٹیاں فراہم کی جائیں۔ وزیراعلیٰ نے اس بات پر بھی زور دیا کہ کالج میں میڈم ناظمہ طاہر بلاک بھی تعمیر کیا جا رہا ہے۔
انہوں نے خواتین کے کردار پر بات کرتے ہوئے کہا کہ جب تک خواتین معاشرے میں مثبت کردار ادا نہیں کریں گی، معاشرہ ترقی نہیں کر سکتا۔ ان کا کہنا تھا کہ آج پانچ خواتین ڈپٹی کمشنر کے طور پر صوبے میں خدمات سرانجام دے رہی ہیں، جو کہ ایک مثبت تبدیلی کی علامت ہے۔
قبل ازیں، وزیر اعلیٰ بلوچستان نے کالج کی 45 طالبات میں پنک اسکوٹیز تقسیم کیں۔ اس تقریب میں وزیر تعلیم راحیلہ درانی، صوبائی وزراء، چیف سیکریٹری اور دیگر اہم شخصیات بھی موجود تھیں۔