اسلام آباد: پارلیمنٹ میں ارکان کی تنخواہوں میں اضافے کے معاملے پر حکومت اور اپوزیشن ایک صفحے پر آگئے، اپوزیشن رہنماؤں سمیت مختلف جماعتوں کے کئی ارکان نے تنخواہوں میں اضافے کے لیے باضابطہ دستخط کیے۔
ذرائع کے مطابق پاکستان تحریک انصاف، سنی اتحاد کونسل اور آزاد ارکان نے بھی تنخواہوں میں اضافے کی حمایت میں تحریری منظوری دی۔ دلچسپ بات یہ ہے کہ تنخواہوں میں اضافے کو "حرام” قرار دینے والے پی ٹی آئی رہنما شاہد خٹک بھی دستخط کرنے والوں میں شامل ہیں۔
تنخواہوں میں اضافے کی حمایت کرنے والوں میں چیئرمین پیپلز پارٹی بلاول بھٹو زرداری، چیئرمین پی ٹی آئی بیرسٹر گوہر، سربراہ جے یو آئی مولانا فضل الرحمان، اور پشتونخوا ملی عوامی پارٹی کے محمود خان اچکزئی شامل ہیں۔
پیپلز پارٹی، ن لیگ، جے یو آئی، نیشنل پارٹی سمیت تمام بڑی جماعتوں کے ارکان تنخواہوں میں اضافے پر متفق نظر آئے۔ اپوزیشن رہنماؤں نے پہلے اضافے کی حمایت کی، تاہم ایوان میں اسی معاملے پر تنقید بھی کی گئی۔
مزید برآں، چیئرمین پبلک اکاؤنٹس کمیٹی جنید اکبر، انور تاج، عبداللطیف، شاہ احد علی، عادل بازئی، شفقت عباس، امجد علی خان، یوسف خان، سلیم الرحمان، حمید حسین، شیر علی ارباب، مبین عارف اور سہیل سلطان بھی اضافے کے حامیوں میں شامل ہیں۔
یہ پیش رفت ایسے وقت میں سامنے آئی ہے جب معاشی حالات اور عوامی مشکلات کے پیش نظر تنخواہوں میں اضافے کا معاملہ حساس موضوع بن چکا ہے۔
